Utod sang anay RPA regional commander sa Leon, patay matapos gintiro sa sulod sang iya balay

Leon, Iloilo–Patay ang utod sang anay regional commander sang Revolutionary Proletarian Army-Alex Boncayao Brigade sang ginsulod kag gintiro sa sulod sang iya balay sa Barangay Lanag, Leon kagab-i.

Suno kay Inspector Rewel Pablico, hepe sang Leon PNP, wala gid nakaluwas si Jessie Capilastique, 34-anyos, bangud sang mga pilas sa dughan, agtang kag tiil.. Nakarecover ang mga pulis sang isa ka empty shell sang caliber 40 kag anum ka baseyo sang m16. Wala naman nakilala sang live-in partner ni Capilastique ang suspek bangud may tabon ang nawong apang iya ginlaragway nga bataon pa kag putot.

Si Jessie Capilastique ang utod ni Demetrio Capilastique alyas Ka Hugo nga regional commander sang RPA-ABB nga gintiro patay man sang Disyembre 30, 2013. Gin-ako sadto sang NPA nga sila ang nagpatay kay Ka Hugo.

Isa sa mga ginasunod nga motibo sang Leon police sa pagpatay kay Jessie Capilastique amo ang away sang NPA kag RPA. (Aine Grace Bravo)