28 ka mga Firecracker-related Incidents halin sa 13 ka mga Banwa ang Narecord sang Iloilo Police Provincial Office ukon IPPO

Iloilo — 28 ka mga firecracker-related incidents halin sa 13 ka mga banwa ang narecord sang Iloilo Police Provincial Office (IPPO) tubtub kahapon.

Kalab-anan mga menor de edad ang nabiktima sang palupok samtang wala naman sang may gin-report nga insidente sang illegal discharge of firearm ukon biktima sang stray bullet sa probinsya.

Sa kabug-usan, malinong ang pagselebrar sang bag-ong tuig wala sapayan sang ginreport nga duha ka shooting incidents sa Janiuay kag Leganes.

Ginakabig sang IPPO nga isolated case ang pagtiro patay kay Inspector Christian Lee Nelmida, ang team leader sang 2nd Manuever Platoon nga nabase sa Jibolo Janiuay.

Padayon  nga gina-negosyar sang IPPO ang pagsungka sang suspek nga si SPO1 Arnold Lizada sang Poblacion Lambunao.

Isolated case man kag wala sang kahilabtanan sa New Year celebration ang pagtiro patay kay Niño Mirasol, 32-anyos sang Guihaman Leganes.

Gintudlo nga suspek si Diosdado Duga-Duga, 27-anyos, tumandok sang Calatrava Negros Occidental kag nagatrabaho nga caretaker sa arosera sang Guihaman nga nadakpan sa follow-up operation sang Leganes PNP. (Nemesio Martirez)