Balo ni the late DOJ Sec. Raul Gonzales-Dr. Pacita Gonzales, nag-demand sang public apology halin kay Mayor Jed Patrick Mabilog kasunod sa pagkadalahig sang iya pangalan sa naglapta nga “white paper”

Iloilo City — Nagdemand sang public apology halin kay Mayor Jed Patrick Mabilog si Dr. Pacita Gonzales, balo ni late Justice Secretary Raul Gonzales.

Nagsulat ang abogado ni Dr. Gonzales nga si Atty. Jurico Fabor-bayaua kay Mayor Mabilog nga nagademand sang public apology halin sa alkalde sa sulod sang 10 ka adlaw pagkatapos nga mabaton ang sulat.

Kasunod ini sang TV broadcast sang alkalde sa diin ginbasa niya ang kaundan sang naglapta nga white paper nga naga-unod sang mga wala nasolbar nga krimen sa syudad nga ginpahayag kahimuan sang alleged Nava-Golez syndicate.

Nabutang man sa papel nga nagahatag sang bulanan nga pahamham si Dr. Gonzales kay Aksyon Jun Capulot kag gindalahig man sa indi maayo nga buluhaton si late secretary Gonzales.

Ginpanginwala ni Dr. Gonzales ang nabutang sa white paper nga una na ginkonfirmar ni ICPO OIC Kashmir Disomangcop nga wala sang kamatuoran ang mga kaundan.

Kon indi mag-apology ang alkalde sa TV broadcast, nagpamahug si Dr. Gonzales nga mapasaka sang kaso nga P20-million damage suit kag libel batuk sa iya.

Daw sa indi makapati si Gonzales nga mahimo siya butang-butangan bisan nga malapit sadto sa iya si Mayor Mabilog. (JoMaque)