Councilor Plaridel Nava, nagaduda nga ginapa-surveillance siya matapos na-obserbahan ang mga gin-detail nga pulis sa atubang sang balay sang iya amay kag nagabantay malapit sa iya balay sa Mandurriao

Iloilo City — Nagaduda si Councilor Plaridel Nava nga ginapa-surveillance siya matapos na-obserbahan nga may gin-detail nga duha ka mga pulis sa atubang sang balay sang iya amay sa Lapuz kag may pito ka pulis nga nag-arkila sa mga boarding houses malapit sa iya balay sa Mandurriao.

Ginpahayag sang konsehal nga wala man sang koordinasyon sa ila ang pagbutang sang mga pulis malapit sa iya area kag sa balay sang iya amay.

Sa Lapuz, ginrason sang hepe sa substation nga nagasunod lang sila sa mandu nga butangan sang police detail.

Ginrason naman suno sa iya sang mga pulis malapit sa iya balay nga ginpadala ang mga ini halin sa manila para mag-augment sa Dinagyang Festival kag Jaro fiesta.

Nagsulat si Nava kay Police Regional Office 6 Director Bernardo Diaz agud magpangayo sang paathag sa matuod nga rason sang tikang. (JoMaque)