Dinagyang Update: Kasadyahan Regional Cultural Competition, nangin madinalag-un!

Iloilo City — Nangin madinalag-on ang Kasadyahan Regional Cultural Competition nga ginpasakupan sang napulo ka mga tribu halin sa mga probinsya sang Guimaras, Antique, Capiz, Iloilo kag Negros Occidental.

Ang Kasadyahan Regional Cultural Competition ang isa sa mga highlights sang 2016 Dinagyang Festival.

Apang wala sang partisipante halin sa syudad sang Iloilo sa Kasadyahan competition subong nga tuig.

Kalakip sa mga performing groups amo ang Masskara Festival sang Bacolod City; Tribu Pantat sang Zarraga; Tribu Pagdayaw sang Dumarao, Capiz; Tribu Patabang sang Tapaz, Capiz; Tribu Bantayan sang Guimbal; Tribu Tatusan sang Caluya, Antique; Tribu Kasag sang Banate; Tribu Salakayan sang Miagao; Tribu Hubon Igbantog sa Karosa sang Nueva Valencia, Guimaras; kag Pinta Flores Festival sang San Carlos City, Negros Occidental.

“Peaceful”

Wala sang may namonitor nga dalagko nga mga insidente sa tion sang Kasadyahan Festival ang Iloilo City Police Office (ICPO).

Suno kay ICPO Director Khasmir Disomangcop, hugot ang pagbantay sang kapulisan kag iban pa nga law enforcers agud masiguro ang malinong kag matawhay nga kahiwatan.

Dako ang nabulig sang ginbutang nga Advance Command Post suno kay Disomangcop agud mabantayan ang tanan nga judging areas lakip na ang sector deployment sang ICPO.

Katuyuan sini nga mapadasig ang pagresponder sang mga pulis sa mga insidente.

24/7 nga naga-operate ang Advance Command Post kag magalawig ini tubtub sa Enero 25 sang kaagahon. (JoMaque)