Councilor R. Leone Gerochi kag TMTRO, naga-negosyar sa Joroshely Terminal agud gamiton sang provincial utility vehicles kasunod sang pagpanirado sang Tagbak Terminal

Iloilo City–Ginanegosyar nanday Councilor R. Leone Gerochi, TMTRO Head Donna Acap kag TMTRO Point Person Mitch Antiqueña ang Joroshely Terminal sa Tagbak, Jaro para gamiton sang mga vans kag jeeps sa pagpapanaug kag pagpick-up sang mga pasahero halin sa probinsya.

Ini ang ginplastar nga solusyon ni Gerochi kaupod ang mga transport groups kahapon kasunod sang pagpanirado sang Tagbak Terminal matapos wala ginhatagan sang extension sa franchise sang City Council. Suno kay Gerochi, puwede man nga makasulod sa Vallacar Transit Terminal ang mga provincial buses.

Nagpasugot suno sa iya ang LTFRB 6 nga indi pagdakpon ang mga drivers kon magsulod sa Joroshely Terminal kag Vallacar Transit bisan asta lang sa Tagbak Terminal ang ila frangkisa.

Nakapangabay naman si Gerochi sa tag-iya sang Tagbak Terminal nga si Mr. Alberto Ladrido III nga padayunon lang ang pag-operate samtang ginahulat ang approval sa extension sang ila franchise. Ginpadal-an sang konsehal sang sulat si Ladrido sang Martes nga maghulat sang isa ka semana para sa ginahingyo nga extension.

Apang nagdesisyon gid ini nga magpanirado kabangdanan nagtalang-talang ang mga pasahero kag pila ka mga motorista. (Aine Grace Bravo)