Facilidad sang Iloilo Sports Complex, preparado na para sa WVRAA meet

Iloilo City — Preparado na ang facilidad sang Iloilo Sports Complex agud gamiton sang mga atleta nga magapasakop sa Western Visayas Regional Athletics Association (WVRAA) meet sa Pebrero 7.

Wala anay ginpabuksan ni Governor Arthur Defensor ang Sports Complex bangud ginapatubo pa sang maayo ang bermuda grass sa palibot sang track oval.

Ginpahayag sang gobernador nga dapat tipigan ang mga facilidad bangud ginbakal ini sang provincial government sa luwas sang pungsod.

Ginbutangan na sang dugang nga suga ang palibot sang Iloilo Sports Complex bangud luyag sang international football player nga maghampang kon gab-i.

Magluwas sini, aregluhon man ni Defensor ang management sang Iloilo Sports Complex sa diin matamad ang iban nga utility workers samtang ang iban may ginabatyag na sa lawas.

Plano man sang provincial government nga pa-untaton na lang sa pagtrabaho ang mga tigulang nga utility workers kag hatagan sang separation pay.

Isa sa mga option sang gobernador amo ang pag-kontrata sa pribado nga kompaniya para sa janitorial services sang Iloilo Sports Complex. (JoMaque)