3 sa 5 ka mga police nga natukiban nag-upod kay Melvin Odicta Jr. nga nag-test fire sa shooting range sa syudad, komfirmado nga aktibo pa sa serbisyo

Iloilo City — (UPDATE)  Komfirmado nga aktibo pa sa serbisyo ang tatlo sa lima ka mga pulis nga natukiban naga-upod upod kay Melvin Odicta Jr nga nag-test fire sa shooting range sa syudad.

Sa impormasyon nga nakalab-ot sa Aksyon Radyo Iloilo, aktibo pa nga pulis sanday SPO3 Joey Rodellado nga assign sa Regional Intelligence Unit; PO3 Ric Poblador nga yara sa Regional Special Operations Group (RSOG) kag PO2 Vicente Amatril nga liason officer sa Regional Health Service Unit.

Retirado naman sanday Lino Duarte nga assign sadtu sa Arevalo PNP kag Romeo Hualde nga na-assign naman sadtu sa Iloilo Police Provincial Office (IPPO).

Yara man sa listahan si Edmund Defensor nga ginaalegar ex-convict kag si Jeffrey Celiz, ang executive assistant for political affairs ni Mayor Jed Patrick Mabilog.

Una na ginpanghiwala ni Celiz nga nakaupod siya sa grupo ni Melvin Jr. bangud isahanon lang siya nga nagkadtu sa shooting range agud magkuha sang gin-order niya nga caliber 40 nga pusil.

Gginpanghiwala man ni Celiz nga nakita niya sa log book ang pangalan nanday Melvin Jr kag mga kaupod sini.

Apang gin-ako ni Celiz nga kilala niya sanday Melvin Jr kag Lino Duarte.

Ang pangalan sang mga retirado kag aktibo nga mga police officers kaupod si Celiz ang namitlangan sa senate inquiry may kaangtanan sa tuyo nga paglusob sang grupo ni PDEA-identified top drug personality Melvin Odicta Sr sa estasyunan sang Aksyon Radyo Iloilo sang nagligad nga tuig. (JoMaque)