UPDATE: Preso nga makaduha ka beses nakapalagyo sa Alimodian police, nadakpan na!

Alimodian, Iloilo–Nadakpan na sang mga pulis ang preso nga makaduha ka beses nga nagpalagyo sang nagligad nga bulan.

Suno kay PCINSP Abner Balgos, hepe sang Alimodian Police Station, na-aresto nila si Erwin Calbonero, 37 sang Sitio Balogo, Barangay Paho, Alimodian, sa Barangay Bagumbayan kahapon sang aga. Nakabaton sang impormasyon ang mga pulis nga malabay sa lugar si Calbonero sakay sa motorsiklo kabangdanan nagconduct sila sang checkpoint.

Nagpasalamat si Balgos sa mga informants nila sa nagkalain-lain nga barangay nga nagbulig sa pagpangita kay Calbonero.

Nadakpan si Calbonero sa buybust operation sang Enero 23 pero nagpalagyo sang Enero 24 sang naglumpat ini sa taytay sa Poblacion sang dal-on siya sa Aleosan District Hagud ipaidalum kuntani sa physical examination. Nadakpan ini makaligad ang duha ka oras sa Barangay Mangguining nga wala na sang posas. Liwat naman ini nga nagpalagyo sang Wnero 26 paagi sa paglagare sang rehas sa karsel sang Alimodian PNP. (Aine Grace Bravo)