Suspek sa pagtiro sa iya utod sa Sara, boluntaryo nga nagsurrender

Sara, Iloilo–Boluntaryo nga nag-surrender sa kapulisan kaina sang aga ang suspek sa shooting incident sa Brgy. Malapaya, Sara kagab-i.

Nagpadulong sa Sara Police Station si Warlito Villa sang amo man nga lugar kasunod sang insidente kagab-i nga nagresulta sa pagkapilas sang iya utod nga si Virgilio Villa, 36, kag asawa sini nga si Ginalyn, 34, kag pakaisa nga si Danilo Villa, 47-anyos.

Suno kay Warlito, na-akig siya sa pakaisa nga si Danilo bangud masami siya nga ginadaug-daug. Wala ini sang tuyo nga tiruhon ang utod apang nagtambag ini sa ila away kabangdanan nga naigo sang disgrasya niya nga napitik ang 12-gauge shotgun. Nasalabat man si Ginalyn sang tuyo man nga magtambag.

Napilasan sa tuo nga kamot si Virgilio samtang nasamaran sa butkon si Ginalyn. Pilas naman sa ulo kag butkon ang naagum ni Danilo matapos ginpistol whip sang suspek.

Handa naman si Warlito nga atubangon ang kaso batuk sa iya. Nagalantaw sang telebisyon ang mga biktima kag suspek samtang naga-inom inom sang natabu ang insidente. Padayon nga ginabulong sa ospital ang mga biktima. (Aine Grace Bravo)