Mayor Jed Patrick Mabilog, ginatudlo nga utok sa gin-alegar “Oplan to ANA” ukon NO to Alim and Nava

Iloilo City — Ang grupo ni Mayor Jed Patrick Mabilog ang utok sa ginpahayag “Oplan NO to ANA”  ukon No to Alim and Nava.

Ginpahayag ni Councilor  Plaridel Nava nga nagapangita gid sang paagi ang alkalde agod nga indi sila magda-og ni Councilor Joshua Alim sa May 9 nga elections.

Kon nagapati si Mabilog sa  pinakaulihi nga resulta sang survey suno kay Nava sa kadam-an sang mga konsehal sang alkalde ang halos mataas ang boto,  kontani indi na sini pagpadayunon ang pagpakalain sa ila ni Alim.

Magluwas sa Oplan No to ANA, naglunsar pa gid si Mabilog sang “Oplan CAPSULE” batuk kanday Nava kag Alim.

Sa impormasyon nga nabaton ni Nava, sa Oplan Capsule pasudlan ni Mabilog sang iya mga tinawo ang ila kampo agod mabal-an ang ila pwersa kag financial nga ikasarang.

Kon mabal-an sang mga tinawo ni  Mabilog nga may pundo sanday Nava kag Alim, ini ang gamiton sang alkalde para sa ila kapierdehan. (Nemesio Martirez)