Taxi driver, ginpadakup sang 16-anyos nga pasahero nga babaye matapos nagreklamo nga gindala sini sa drive-in motel; suspek, nagpanghiwala nga may tuyo siya nga malain sa menor de edad!

Iloilo City — Nakumbinser sa matam-is nga istorya angut sa sex ang taxi driver kabangdanan nga ginhagad sini ang 16-anyos nga pasahero nga babaye nga mag-check in sa motel.

Suno kay alyas Totong, 53-anyos sang City Proper, nagpadul-ong ang iya pasahero nga si alyas Inday sa Jaro kag samtang nagabiyahe, gina-istoryahan nila ang away sini sa iya nobyo.

Ginpahayag ni Totong nga nagayuhom lang si Inday kon istoryahon angut sa sex kabangdanan nangisog siya nga idiretso ang taxi sa isa ka motel sa Bolilao, Mandurriao.

Sang nag-abot sa motel, wala nagpasugot si Inday nga mag-check in kag wala man nagpamilit si Totong.

May ginhatag pa nga calling card si Totong sa pasahero antes ini gindul-ong sa Benedicto Jaro.

Alas 7 sang gab-i, nagtawag si Inday agud magpasugat apang nakibot si Totong sang gindakup siya sang pulis.

Preso si Totong sa karsel sang Jaro PNP bangud sa paglapas sa Child Abuse Law.

Nagpanghiwala naman ini nga ginhurikap niya ang dalagita. (JoMaque)