Pagkutkot sa sulod sang Campo Santo ukon chapel sa sulod sang sementeryo sa San Joaquin, ginreklamo sang mga residente!

San Joaquin, Iloilo–Ginreklamo sang mga residente ang pagkutkot sa Campo Santo sa Catholic Cemetery Simbahan Katoliko sang banwa.

Suno kay Punong Barangay Napoleon Secondes sang Purok 1 (Poblacion), natukiban nila nga Disyembre pa nagsugod ang pagkutkot kag nakibot sang nakita kagab-i nga nagadalum na sang ginabanta 50 ka tapak ang buho. Nadumduman pa ni Secondes nga ginkadtuan siya sadto ni Father Nelson Selvila, parish priest sang San Joaquin Parish Church, kag ginhambalan nga may proyekto siya pero wala man ginsugid kon ano ini.

Na-alarma si Secondes sang namutikan nga nagadamo ang tinumpok sang duta sa sulod kag bisan sa guwa sang Campo Santo. May impormasyon nga naguwa nga ginhimo ang pagkutkot bangud may bulawan sa idalum sang chapel.

Gindakup sang San Joaquin police ang 10 ka mga nagakutkot nga naghalin pa sa lain-lain nga lugar kag posible pasakaan sang kaso nga paglapas sa National Cultural Heritage Act of 2009 bangud gindeklarar ang Campo Santo nga national treasure. Wala sang permit ang pagkutkot suno kay Senior Inspector Raymond Gemarino, hepe sang San Joaquin PNP.