10 ka lalaki nga nadakpan nagakutkot sa sulod sang Campo Santo sang Catholic Cemetery, pasakaan sang kaso subong nga adlaw

San Joaquin, Iloilo–Pasakaan subong nga adlaw sang kaso nga paglapas sa Protection of Natural Cultural Heritage Act ang 10 ka mga lalaki nga nadakpan nga nagakutkot sa campo santo sang Catholic Cemetery sang banwa.

Suno kay PSINSP Raymond Gemarino, hepe sang San Joaquin PNP, nasaad sa laye nga multahan sang indi magnubo sa PHP200, 000 kag pagkapreso sang tubtub sa napulo ka tuig ang mga nagalapas sa laye. Hipos ang mga nadakpan kag wala gid nagsugid kon sin-o ang nagsugo sa ila nga magkutkot sa campo santo.

Narecover man sa mga na-aresto ang kagamitan sa pagkutkot sang buho nga ginabanta nagadalum sang 50 ka tapak.

Ginpahayag ni Gemarino nga gintinguhaan nila nga tawgan si Father Nelson Silvela, ang kura paruko sang Simbahan Katoliko sa banwa, pero wala ini nagasabat. Maayo kuntani suno sa iya nga makasabat ang pari agud makahatag sang kasanagan sa pagduda nga siya ang nagsugo sa pagkutkot.

Una na gin-alegar sang sepulturero nga si Billy Savare nga ginhambalan siya ni Silvela nga indi magpahilabot sa iya proyekto matapos natukiban ang pagkutkot sa campo santo. (Aine Grace Bravo)