Campo Santo sa San Joaquin, ginsiraduhan kasunod sang natukiban nga pagkutkot sang 10 ka ginapatihan treasure hunters

San Joaquin, Iloilo —  (Update) Ginpasiraduhan na ang Campo Santo sa sementeryo sang San Joaquin.

Gin-padlock ang pwertahan suno kay Inspector Raymond Gemarino sang San Joaquin PNP agod indi na mapadayun ang pagkutkut sa Campo Santo.

Samtang i-verify pa sang San Joaquin PNP sa Land Transportation Office kon sin-o ang nagapanag-iya sang van nga may plate number WQN-205 nga ginasakyan sang 10 ka mga tawo nga nagkutkut sang Campo Santo.

Ginpasaka na ang kaso sa Provincial Prosecutor’s Office batuk sa 10 ka mga tawo bangud sa paglapas sa Republic Act 10066 ukon Protection of National Cultural Heritage.

Ginpasakaan man sang kaso ang kura paroko nga si Father Nelson Silvela base sa affdavit nanday Purok Uno punong barangay Napoleon Secundes kag sepultorero nga si Billy Savare nga nagatudlo sa pari nga amo ang utok sa pagkutkut. (JoMaque)