ICLAJODA Pres. Boyet Parcon, pabor sa plano nga kakason bilang TMTRO Head si Donna Acap

Iloilo City — Pabor si Iloilo City Loop Alliance of Jeepney Owners and Drivers Association (ICLAJODA) President Raymundo “Boyet” Parcon sa plano ni Mayor Jed Patrick Mabilog nga kakason ang hepe sang Transportation Management and Traffic Regulation Office (TMTRO).

Tion na suno kay Parcon nga aksyonan ni Mayor Mabilog nga kakason si TMTRO Head Donna Acap bangud sang nagalala nga trapiko sa syudad.

Halin sang nagpungko si Acap sa TMTRO, wala sang nadumduman ang mga miembro sang transport association nga nagtawhay ang trapiko sa mga mayor nga dalan sa syudad.

Dapat magpangita si Mabilog sang magabulos kay Acap nga may kaisog, panindugan kag wala sang may ginapaboran kon parte sa trapiko.

Ginpanugyan man ni Parcon nga i-overhaul ni Mabilog ang TMTRO agud madula ang extortion activities kag ilisan ang mga supervisors nga wala nagatrabaho sang insakto. (JoMaque)