Re-calibration sang mga taxi meters sa Western Visayas para sa 30 pesos nga flag down rate, tinguhaan sang LTFRB 6 nga masuguran sa Mayo 15

Iloilo City — Tinguhaan sang Land Transportation Franchising and Regulatory Board (LTFRB 6) nga makumbinser ang LTFRB board sang central office nga suguran ang re-calibration sang mga taxi meters sa Western Visayas sa Mayo 15 tubtub sa Hunyo 15 para sa 30 pesos nga flag down rate.

Masarangan nga i-recalibrate ang mga taxi meters sa Western Visayas suno kay LTFRB 6 legal officer Jose Marie Lamparero bangud diutay lang ang mga units kon ipanggid sa Metro Manila.

Apang kon indi magpasugot ang board, sundon sang LTFRB 6 ang schedule sang re-calibration nga ginhatag sang LTFRB central office.

Base sa schedule, ang mga plate numbers nga may last digit numbers 2,4 kag 9 ang i-recalibrate sa Abril samtang ang 5-7-0 sa Mayo kag ang 1-3-6 kag 8 ang sa Hunyo.

Ang re-calibration suno kay Lamparero kasunod man sa mandu sang LTFRB central office nga himoon nga permanente ang flag down rate kag P3.50 sa tagsa ka 500 metros.

May kinamatarong ang pasahero suno sa iya nga magsukot sang 10 ka pesos bisan pa sang re-calibration bangud sang nagligad pa nga tuig ginpatuman sang ahensya ang provisional order nga 30 pesos nga flag down rate. (JoMaque)