UPDATE: Kaso batuk sa mga suspek nga nagpatay sa HR Supervisor sang Taytay sa Kauswagan, indi pa mapasaka suno sa Dumarao police bangud sang kulang nga testigo

Iloilo–Indi pa makapasaka sang kaso ang composite team nga naga-imbestigar sa pagpatay kay Taytay sa Kauswagan, Inc. HR Supervisor Leah Sorongon-Pasamonte.

Ginatipon pa sang mga pulis ang mga ebidensya kag nagapangita sang dugang nga mga testigo sa Barangay Taslan, Dumarao sa diin nasapwan ang bangkay ni Pasamonte nga nagapos sa puno sang kahoy. Ginpahayag ni PINSP Wilfredo Escalera, hepe sang Dumarao Police Station, posible mapasaka ang kaso sa masunod nga semana kon makumpleto na ang tanan nga dokumento.

Una na nga ginpabutyag ni Iloilo Police Provincial Office (IPPO) Director PSSUPT Roderick Augustus Alba nga nakilala na ang isa mga suspetsado base sa statement sang duha ka mga testigo. Daku ang pagpati sang mga pulis nga planado ang pagpatay kay Pasamonte.