#Desisyon2016: San Enrique Mayor Ramona Palabrica-Go kag Former Mayor Trixie Fernandez, Nagsabat sa mga Mainit nga Isyu sa Candidate’s Forum sang Aksyon Radyo Iloilo kag UPV sa Halalan 2016

San Enrique, Iloilo–Nangin mainit ang ikaduha nga hugnat sang Candidate’s Forum sang Aksyon Radyo Iloilo kag UPV sa Halalan 2016 sa mga nagapadalagan  nga alkalde sa San Enrique kahapon.

Ginsabat nanday incumbent Mayor Ramona Palabrica-Go kag former Mayor Trixie Fernandez ang mga mainit nga isyu nga ginhaboy sa ila. Sanday Go kag Fernandez lang ang nahatagan sang kahigayunan nga makasabat sa mga ginahaboy nga isyu matapos nagpahibalo ang isa pa ka kandidato sa pagka-mayor nga si Milando Pama nga indi ini makatambong sa debate bangud nagpabulong.

‘Accomplishment’

Ginbanatan ni Mayor Go ang ginpabugal ni Fernandez nga accomplishments sang siya pa ang alkalde sang banwa. Gintumod ni Go ang wala natapos nga tulay sa Barangay Palje kag ang road junction pakadto sa Jalaur River nga wala nahuman suno sa alkalde pero “completed” ang nabutang sa proyekto. Suno kay Go, 10% tubtub 15% lang ang nangin accomplishments ni Fernandez sa siyam ka tuig sini nga pagpungko.

Gintawag naman ni Fernandez nga biased ang assessment ni Go sa iya pagpangalagad bangud sang 2013 lang ini nga nag-abot sa banwa kag wala nasaksihan ang iya mga binuhatan halin 2004 tubtub 2013. Ang mga pumuluyo lang suno sa iya ang makahusga kon ano ang mga hinimuan niya sa San Enrique.

‘Yolanda, 4Ps’

Indi naman matuod suno kay Mayor Go nga indi siya makita pagkatapos sang paglaslas sang Supertyphoon Yolanda sang 2013. Suno kay Go, naglibot siya sa mga eskuwelahan kag madamo ang maka-testigo sang iya presensya.

Ginsabat man sang alkalde ang reklamo sang benipisaryo angut sa atrasado nga pag-abot sang 4Ps benefits. Ginpa-athag ni Go nga wala ini nagapahilabot sa 4Ps bangud wala naga-agi sa iya opisina ang pag-release sang kwarta. Gin-engganyo man sini ang nagareklamo nga benipisaryo nga pasakaan sang kaso ang mga tawo nga nagapa-atrasar sa pag-release sang kuwarta sa 4Ps.

‘Philhealth, GSIS, PAGIBIG’

Nagdepensa si former Mayor Fernandez sa isyu sang indi pag-remit sang Philhealth contributions para sa mga pigado nga pumuluyo sang banwa kag ang pag-indict sa iya sang Ombudsman angut sa atrasado nga pag-remit sang GSIS kag pag-ibig contributions sang mga empleyado sang munisipyo.

Suno kay Fernandez, gintunga sang banwa kag provincial government ang pagbayad sa P1,200 nga premium sang Philhealth. On-time suno sa iya ang pagbayad sang banwa pero sang 2008, nagka-problema ang pagbayad bangud gin-untatan ni anay Governor Niel Tupas ang subsidy rason nga nagdaku ang balayran tubtub indi na masarangan sang banwa ang dugang nga galastuhan.

Sa atrasado naman nga pag-remit sang GSIS kag PAG-IBIG contributions, gin-ako ni Fernandez nga indi lang ang San Enrique ang may delay sa remittance kundi ang iban man nga banwa. Na-atrasar suno sa iya ang pagbayad sang contributions bangud nagaka-delay man ang sweldo sang mga empleyado. Magluwas sini, may mga nagatuhaw man nga galastuhan sa banwa nga nagaresulta sang pagpa-iway sang sweldohanay sang pila ka adlaw. (Aine Grace Bravo)