Bana sang Kandidato sa pagka-SB member sa San Remigio Antique, Gin-aresto bangud sa Paghupot sang mga Pusil

Antique — Gin-aresto ang bana sang kandidato sa pagka-SB member sa San Remigio, Antique bangud sa paghupot sang mga pusil.

Ginpahayag ni Inspector Herminio Dayrit, hepe sang San Remigio Police Station nga ila narecover sa balay ni Ernesto Gallo, 73-anyos sang Barangay Calawisan 2 ang KG 9 machine pistol, isa ka magazine, 12 ka live ammunitions kag homemade 12 gauge shotgun.

Duha lang ka pusil ang narecover suno kay Dayrit bisan pa nga 3 ang nabutang sa search warrant nga ginalakipan sang machine pistol, homemade shotgun kag 38 caliber revolver.

Gin-athag ni Dayrit nga wala sang labot ang politika sa ila pag-serbi sang search warrant kag gin-base lang sa reklamo sang mga pumuluyo nga halod kada gab-i nagapalupok sang pusil si Gallo.

Si Ernesto Gallo, may negosyo sa Sibalom, Antique kag bana ni Erna Gallo nga kandidato sa pagka-sangguniang bayan member sa San Remigio, Antique.   (JoMaque)