UPDATE: Kontrata sa Water Delivery, Ginterminate na sang Syudad sa Holland Water Refilling Station

Iloilo City–Nakapadala na sang sulat ang City government sa Holland Water Refilling Station nga nagapabalo sang pag-terminate sang kontrata para sa water delivery.

Ginrason sang syudad sa pag-terminate sang kontrata ang pagsugod sang rainy season kag ang tayuyon nga water supply halin sa Metro Iloilo Water District (MIWD). Suno kay Atty. Mark Piad, spokesperson ni Mayor Jed Patrick Mabilog, ginbasehan man sa pag-terminate sang kontrata ang pag-ako sang Holland Water nga indi na nila masarangan ang pagrasyon sang tubig bangud kulang ang ila supply bangud sang El Niño.

Ginpahayag ni Piad nga bisan may rason man ang Holland Water sa indi pagrasyon sang tubig, kinahanglan gihapon nila nga magsumiter sang written explanation. Abril 20 sang gin-award sa Holland Water ang kontrata apang nagreklamo ang mga punong barangay sa apektado nga mga barangay nga wala gid sang water delivery. (Aine Grace Bravo)