64-anyos nga Babaye, gindakup bangud Gindala Paguwa sa Mall sa City Proper ang wala Nabayaran nga Grocery items

Iloilo City — Nadakpan ang 64-anyos nga babaye nga nagpang-shoplift sa mall sa City Proper kahapon.

Ginbayaran lang ni Thelma Sampiano sang Barangay Nasunogan Dao, Capiz ang balde nga iya ginbakal.

Pero sang gin-usisa sang guwardya, natukiban nga puno sang grocery items ang balde. Ginpapreso si Sampiano sa karsel sang Police Station 1.

“Real Name”

Nagligwat sang statement ang senior citizen nga gindakup bangud gindala paguwa sa mall sa City Proper ang grocery items nga wala nabayaran kahapon.

Una nga nagpakilala ang nadakpan kay Thelma Sampiano, 64 anyos pero kaina sang aga, ginpahayag sini nga Lydia Silva, 63 anyos sang Sta Rosa, Mandurriao ang iya matuod nga pangalan.

Ginpahayag sini nga ginbag-o niya ang pangalan bangud wala nakahibalo ang iya pamilya sa natabu.

Nag-apelar si Silva sa tag-iya sang Unitop nga kaluoyan siya kag pabayran na lang ang mga items nga nagabalor sang masobra P500.

Una nga ginbayaran ni Silva ang tinapay kag balde nga ginbakal pero natukiban sang guwardya nga puno ini sang wala nabayaran nga grocery items.

Ginpahayag ni Silva nga ginapanag-iyahan sang iya kaupod ang mga grocery items pero wala na sini nakita.

Preso gihapon si Silva sa karsel sang pPlice Station 1 kag posible pasakaan sang kaso nga pagpangawat. (JoMaque)