8 ka mga Kolehiyo kag Unibersidad sa Western Visayas, Naghingyo sang Tuition Fee Increase

Walo ka mga kolehiyo kag unibersidad sa rehiyon ang naghingyo sang tuition fee increase sa Commission on Higher Education (CHED) 6.

Suno kay Dr. Rex Casiple, education program specialist sang CHED 6, naka-comply na sang mga requirements ang nasambit nga mga eskwelahan. Sa walo ka mga kolehiyo kag unibersidad, anum ang halin sa Iloilo City, isa sa Roxas City kag isa sa Aklan.

Ginalakipan ini sang Central Philippine University, San Jose College, Sagrado Corazon de Jesus, Iloilo Doctor’s-College of Medicine, STI kag University of Iloilo sa Iloilo City; Filamer Christian University sa Roxas City, Capiz; kag STI-Kalibo sa Aklan.

Kalabanan sa mga rason sang eskwelahan sa pagpatuman sang tuition fee increase ang pagpataas sa sweldo sang mga manunudlo kag mga non-teaching staff kag pagpa-improve sang ila mga pasilidad. Maga-epekto ang tuition fee increase sa pagsugod sang school year 2016-2017 suno kay Casiple. (Aine Grace Bravo)