Night Hub sang Syudad sa Smallville Complex, Mas Hugot nga Ginabantayan sang mga Pulis!

Mandurriao, Iloilo City–Nagsugod na bantay ang mas ginpabaskug nga pwersa sang mga pulis sa Smallville Complex.

Suno kay PSINSP Jojo Tabaloc, hepe sang Mandurriao Police Station, walo ka mga pulis ang gin-assign nga magbantay sa night hub sang syudad kada gab-i. May augmentation man halin sa Iloilo City Public Safety Company kon weeknights.

Duha ka pulis ang gin-assign sa entrance sa Smallville Complex, duha sa exit sa Boardwalk Area, duha ang ginbutang sa dalan padulong sa Atria kag duha sa crime-prone area sang lugar. Mas hugot ang pagbantay halin alas-9 sa gab-i tubtob alas-5 sang kaagahon.

Magalibot man suno kay Tabaloc ang patrol car, motorcycle patrol kag bike patrol agud masiguro nga wala sang matabu nga mga insidente.

Sa record sang Mandurriao Police Station, narecord ang 16 na ka kaso sang physical injuries, duha ka stabbing incidents kag may shooting incident man sa Smallville Complex halin Enero tubtub subong nga bulan. (Aine Grace Bravo)