(UPDATE) Warrant of Arrest Batuk sa Wanted nga Pulis nga Suspek sa Pagtiro-Patay sa Iya Team Leader sa Janiuay sang New Year’s Eve, Ginpaguwa na sang Korte!

Iloilo–Nagpaguwa na sang warrant of arrest ang 6^th Judicial Region sang Regional Trial Court para sa wanted nga pulis nga si SPO1 Arnold Lizada sang Lambunao.

Si Lizada ang gintudlo nga nagtiro-patay kay PINSP Christian Lee Nelmida, team leader sang 2^nd Maneuver Platoon nga na-base sa Jibolo, Janiuay, sang Disyembre 31 sang nagligad nga tuig.       Ginkumpirmar ni Iloilo Police Provincial Office (IPPO) Director PSSUPT Roderick Augustus Alba nga nabaton niya ang warrant of arrest para kay SPO1 Lizada sa kaso sini nga murder.

Subject sang manhunt operation sang IPPO si Lizada sa diin nagtukod sang mga tracker teams si Alba nga magatutok sa pagpangita sa wanted nga pulis. Gin-athag ni Alba nga antes pa man naguwa ang arrest warrant, nagmandu na siya dakpon si Lizada bangud armado ini sang pusil nga ginapanag-iyahan sang gobierno.

Magluwas sa kaso kriminal, ginpasakaan man sang kaso administratibo si Lizada. (Aine Grace Bravo)