Bag-o nga Acting Director sang Iloilo Police Office, Nagkumpirmar nga Nalakip sa Ila Drug Watchlist ang Negosyante nga si Melvin Odicta alyas Boyet!

Iloilo City–Wala nahadlok si Iloilo City Police Office OIC PSSUPT Remus Zacharias Canieso sa ginkilala sang PDEA 6 nga top drug personality sa Iloilo nga si Melvin Odicta alyas Boyet.

Ini ang matigdas nga pahayag sang bag-o ginpahamtang nga ICPO acting director kadungan sang pagkumpirmar nga nalakip ang pangalan ni Odicta sa ila nga drug watchlist. Suno pa sa iya, ang mga criminal ang dapat mamroblema kag indi siya.

May paandam man ini sa mga sindikato sang illegal nga druga sa iloilo. Dapat suno sa iya nga magpreparar na ang mga ini.

Sa publiko naman, nagpangabay si Canieso nga magbulig sa mga pulis sa kampanya ilabe na batok sa illegal nga druga. Ang kampanya suno sa iya, indi magmadinalag-un kun indi pag-ugyunan sang tanan.

Si Canieso ang miembro sang PNPA Tagapagbuklod Class of 1989. (Aine Grace Bravo)