Update: Kaso batuk sa Iloilo City Government kag sa Double Dragon Properties Corp. angut sa GIFT, gin-file na sang Guimaras Provincial Government

Iloilo City — Gin-file na sang Guimaras Provincial Government ang kaso batuk sa Iloilo City Government, City Council, Double Dragon Properties Corporation kag sa Guimaras-Iloilo Ferry Terminal Corporation kaina sang aga.

Ginkomfirmar ni Board Member kag Vice Governor-elect John Edward Gando nga ginpasaka ang kaso sa Branch 65 sang Guimaras Regional Trial Court.

Nag-upod sa pag-file sang kaso si Guimaras Governor Samuel Gumarin, Provincial Legal Officer kag abogado sang mga private plaintiffs.

Nagalaum si Gando nga antes pa ma-aksyonan ang ila petition, maka-isyu na ang korte sang temporary restraining order (TRO) para sa natalana nga pagbukas sang Guimaras-Iloilo Ferry Terminal.

Ginapamatukan sang mga guimarasnon ang P11 nga terminal fee kag ang wala sang basehan nga pagpasira sang Ortiz kag Parola wharves nga mangin dako nga halit sa mga pumuluyo. (JoMaque)