2 ka Pulis, Gintudlo nga Nagpalupok sang Pusil sa Magkatuhay nga Lugar sa Syudad

Iloilo City–Na-areglo na ang away sang pulis kag isa ka pamilya sa Bo. Obrero kagab-i matapos nga gintudlo si PO1 Raymund Opiaza, assigned sa Sta. Barbara Police Station, nga nagpamakdol kag nagpalupok sang pusil.

Sa version ni Opiaza, nag-warning shot lang ini bangud nga natripingan sila sang iya tiyo sang nagkadto sa belasyunan. Suno naman sa mga residente, gindukol sang pulis si Alfredo Novilla, 20-anyos, gani nga ginpulihan ang suspek kag iya tiyo.

Sa pihak nga bahin, ginpasuni man nga pulis ang nagpalupok sang pusil sa McArthur Drive, Tabuc Suba, Jaro. Apang nakapalagyo na ang suspek pag-abot sang mga pulis.

Naigo sang bala ang makina sang motorsiklo kag na-recover man ang isa ka empty shell, duha ka slug kag isa ka live ammo sang ginapatihan 45-caliber pistol. Plano naman ipatawag sang punong barangay sa Tabuc Suba ang tag-iya sang balay nga gina-arkilahan sang suspek agud makilala ini. (Aine Grace Bravo)