Hepe sang Estancia Police Station, Gin-relieve kasunod sang Hostage-taking Incident
Iloilo City — Gin-relieve na si Inspector Sammy Daguro, ang hepe sang Estancia police station.
Suno kay Superitendent Gilbert Gorero, information officer sang PRO 6, ginmandu ni Director Bernardo Diaz ang pag-relieve kay Daguro matapos ginsulod sang hostage taker nga si Romy Albor alyas Burot ang police station sa diin natabuan nga wala gid sang may naka-duty nga PNP personnel.
Suno pa kay Gorero, ginadayaw kag ginapasidunggan ni Diaz ang police nga may maayo nga performance apang ginasilutan naman ang nagapatumbaya sa ila katungdanan.
Ginrason ni Daguro nga wala sang PNP personnel ang police station bangud nag-responder sa kinagamo ang iya mga tinawo samtang ang iban naman ang may court duty.
Wala pa sang ideya si Gorero kon sin-o ang ibulos kay Daguro.
Ginsulod ni Albor ang police station sang nagligad nga adlaw kag gin-hostage ang 3 ka mga non- uniformed personnel ukon NUPs.
Napatay si Albor sang natiruhan sang SWAT team sang Iloilo Police Provincial Office (IPPO). (JoMaque)