Bakhaw Punong Barangay Remia Gregori, Nagturn-over sang mga Pusil sang iya Bata kag Hinablos sa Mandurriao Police

Iloilo City–Gin-turn over ni Bakhaw, Mandurriao Punong Barangay Remia Prevendido-Gregori ang duha ka pusil nga ginpahayag ginapanag-iyahan sang iya anak kag hinablos kagab-i.

Las 9:15 kagab-i sang gintugyan ni Kapitan Gregori kay PSINSP Jojo Tabaloc, hepe sang Mandurriao Police Station, ang M16 rifle sang iya anak nga si Bonnie Gregori kag ang 45-caliber pistol ni Ednie Jimena. Una na ginbalik-balikan ni Tabaloc ang Bakhaw kag gin-engganyo ang mga durugista sa barangay nga magsurrender.

Lakip sa nagsurrender sang damlag lang si Bonnie nga isa sa mga high profile drug personalities sa Bakhaw. Isa man sa gin-negosyar sang Mandurriao police kay Bonnie ang pagsurrender sang ila mga armas.

Ginahulat man ni Tabaloc ang pagsurrender sang number 1 drug personality sa ila listahan nga si Richard Prevendido nga una na ginkilala sang Philippine Drug Enforcement Agency ukon PDEA 6 nga isa sa mga drug group leaders sa Iloilo. (AGB)