2 ka Service Vans ni Mayor Jed Patrick Mabilog, Nagupi sa Karambola sang mga Salakyan sa Pavia!
Pavia, Iloilo–Nagupi ang duha ka service vans sang Iloilo City Mayor matapos nadalahig sa pagkarambola sa Barangay Ungka I kahapon sang aga.
Masugat kuntani ang mga vans kay Mayor Jed Patrick Mabilog sa Iloilo Airport sa Cabatuan sang natabu ang aksidente. Nagreklamo sang pagpanalakit sang lawas ang tatlo ka bodyguards sang alkalde nga sanday Jose Lorde III, Julius Alcalde kag Elwen Ian Altas.
Nabungguan sang 10-wheeler water tanker nga ginamaneho ni Jomer Galido ang likod sang back-up van sang City Mayor. Bangud sa impact, nabungguan man sang back-up van ang lead van sa atubang sini nga nagbunggo naman sa depasahero nga jeep nga may biyahe Sta. Barbara nga iya ginasundan.
Wala naman sang nasamaran nga pasahero sang jeep bangud nakapanaug na antes ang insidente. Ginabanta naman ni Galido nga nagadalagan siya sang 40kph. (AGB)