Mga Pulis sa Probinsya, Sunod-Sunod nga Nag-conduct sang Buybust Operations

Iloilo–Sunod-sunod nga buybust operation ang ginhimo sang mga pulis sa probinsya kagab-i.

Sa Pavia, nadakpan sa Purok 4 ang subject nga si Mamerto Olate Jr, utod sini nga si Loreto kag mag-utod nga Jenewel kag Joel Tanaman. Nakuha sa ila ang apat ka sachets sang suspected shabu, 200 pesos nga marked money kag mga drug paraphernalia.

Sa Ajuy, nadakpan si Lloyd Estacion, 36-anyos sang Barangay Tipacla nga nabaklan sang dos mil pesos nga balor sang suspected shabu. May nakuha pa gid nga duha ka sachets sang suspected shabu. Suno kay PSINSP Charlie Sustento, hepe sang Ajuy Police Station, ginsubject nila sa Oplan Tokhang si Estacion pero wala nagsurrender.

Ginpreso man ang magtiyo sa Barotac Viejo nga nadakpan sa buybust operation. Nakuhaan kanday Cirilo Clomer kag Mark Azucena sang Barangay San Lucas sang apat ka sachets sang suspected shabu, 300 pesos nga buybust money kag mga drug paraphernalia. Nakapalagyo naman si June Caborobias. Si Clomer ang nagsurrender sang damlag lang paagi sa Oplan Tokhang pero gin-operate bangud namonitor nga padayon sa pagbaligya sang illegal drugs. (AGB)