UPDATE: 2 ang Patay sa Aksidente sa Buhang, Jaro

Iloilo City–Ginpasakaan na sang kaso ang driver sang owner-type jeep nga nagbunggo sa tatlo ka tawo nga nagapahangin sang goma sang 6-wheeler truck sa Barangay Buhang, Jaro kahapon.

Kaso nga reckless imprudence resulting to homicide and multiple serious physical injuries ang ginpasaka sa driver nga si Cecilio Iwayan, 36-anyos sang Cebu City. Suno kay SPO2 Van Erick Solarte sang Jaro Police Station, nagapabilin nga preso sa ila karsel si Iwayan.

Dead-on-arrival sa WVSU Medical Center si Rodel Nicolas, 34-anyos, samtang napatay kahapon sang hapon ang kaupod sini nga pahinante nga si Christopher Echinique sang Aparri, Cagayan. Padayon naman nga ginabulong sa ospital ang driver sang truck kag amay ni Christopher nga si Ernesto Echinique. (AGB)