UPDATE: PO3 Allan Lasat, Nanginwala nga Nagrepresentar siya Para kay IPPO Director PSSUPT Roderick Augustus Alba sa Sinapol sang mga Gambling Operators!

Ginpanginwala ni PO3 Allan Lasat ang akusasyon nga siya ang nagrepresentar para kay Iloilo Police Provincial Office (IPPO) Director PSSUPT Roderick Augustus Alba sa sinapol sang mga gambling operators sa Richmonde Hotel sang Hulyo 15.

Suno kay PO3 Lasat, wala sang kamatuoran ang naguwa nga istorya nga siya man ang nag-set sang meeting sa mga gambling operators. Imposible suno kay Lasat nga mapati sa ordinaryo nga pulis pareho sa iya ang mga gambling operators.

“Kilala ko”

Gin-ako ni Lasat nga kilala niya ang mga “old players” sa illegal gambling operations bangud madugay siya na-assign sa Regional Special Operations Group ukon ROSG. Nabatian man sini ang pangalan nga “Uncle Sam” pero nagapati ang pulis nga pareho man ini nga tawo nga madugay na naga-operate kag naga-remit sa Barangay Daga, Sta. Barbara.

Sa impormasyon nga nakuha sang Aksyon Radyo Iloilo, si “Uncle Sam” amo ang ginreport nga bag-o nga operator sang illegal gambling sa probinsya kag iga-finance sang drug lord.

“Masakit”

Masakit naman suno kay Lasat nga ginpasibangdan siya nga protector sang illegal gambling. Nagapati si PO3 Lasat nga ang nasambit nga impormasyon amo ang rason sang pag-relieve sa iya kag gin-assign sa Cordillera Administrative Region. (AGB)