Punong barangay sa Banate, Dakup sa Drug bust Operation

Iloilo City — Pagkasuhan ang punong barangay sa Banate bangud sa paghupot kag pagbaligya sang illegal nga druga kag paghupot sang pusil nga wala sang lisensya.

Nadakpan sa buybust operation sang gintingub nga puwersa sang Banate Police kag Provincial Anti-Illegal Drug Special Operations Task Group (PAIDSOT) si Talocgangan Punong Barangay Rodolfo Baldemor, 55-anyos kag iya bata nga si Ronan, 33-anyos.

Nakuha sa mag-amay ang 6 ka plastic sachets sang suspected shabu; P1,790; caliber 45 pistol with magazine kag 7 ka live ammunition kag 45 submachine gun with magazine kag 3 ka live ammunition.

Nadakpan si punong barangay Baldemor bangud sa pagbaligya sang illegal nga druga apang ginhilway matapos nakapiyansa.

Namonitor sang PAIDSOT kag Banate police suno kay PAIDSOT Head Senior Inspector John Ryan Doceo nga padayon nga nagabaligya sang illegal drugs ang punong barangay sa nakaligad nga 4 ka bulan. (JoMaque)