Duha ka Pulis nga Una Nagresponder sa Crime Scene sa diin Gintiro Patay ang Mag-asawa nga Melvin kag Meriam Odicta, Nagpa-paraffin test

Iloilo City–Nagpa-paraffin test ang duha ka pulis nga assigned sa Public Safety Company sa Aklan nga una nga nagresponder sang gintiro patay ang mag-asawa nga Melvin kag Meriam Odicta sa Caticlan Jetty Port sa Malay, Aklan.

Ginpa-ballistic examination man nanday PO1 Mahid Kamsa kag PO1 Ronald de Tomas ang ila issued firearms nga ginalakipan sang Glock 17 9mm kag 9mm Beretta.         Katuyuan sini suno Police Regional Office 6 Public Information Officer PSUPT Gilbert Gorero nga mahibaluan kun nakapalupok sang pusil ang duha ka pulis.

Tuyo man sini nga madula ang pagduda sang publiko nga may kahilabtanan ang mga pulis sa kamatayon sang mag-asawa nga Odicta.

Sanday PO1 Kamsa kag PO1 de Tomas ang nagkarga sa mga Odicta sa police patrol kag nagdala sa ospital. (AGB)