(Update) Esperanza-Tanza City Proper Punong Brgy. Noel “Nene” Odicta, Nag-sorry sa Management sang Aksyon Radyo Iloilo angut sa Tuyo nga Pagsaka sang iya Magolang nga si Melvin sa Estasyunan sang Nagligad nga tuig

Iloilo City — Nag-sorry si Esperanza-Tanza City Proper Punong Brgy. Noel “Nene” Odicta sa management sang Aksyon Radyo Iloilo ilabe na kanday station manager John Paul Tia kag anchor Jun Capulot sa tuyo nga pagsaka sang iya magulang, ang ginpatay nga si PDEA 6 identified drug group leader Melvin Odicta, sa estasyunan sang nagligad nga tuig.

Sa ginpatawag nga press conference ni punong barangay Odicta kaina sang aga, nag-sorry ini kag nagpangabay sang paghangup para sa ila pamilya.

Gin-athag naman ni Odicta nga wala sila sang kalain sang buot sa mga pulis kag sa pagkamatuod, nagapasalamat sila bangud sa pagbantay sa ila seguridad subong.

Aminado ini nga tuman ka sakit para sa pamilya nga ginpatay gid ang mag-asawa.

‘Magpakalinong’

Luyag na sang pamilya Odicta nga magpakalinong kasunod sang pagpatay sa mag-asawa nga Melvin kag Meriam Odicta.

Ginpahayag ini ni Esperanza-Tanza punong barangay Odicta, utod ni Melvin, sa press conference nga iya ginpatawag kahapon.

Suno kay Odicta, magapadayon sila sa pagkabuhi sang normal kag magabulig man sa gobyerno sa kampanya kontra illegal nga druga.

Ginpromisa man ni Odicta bilang kapitan nga indi pagpasugtan nga may ma-involved pa sa illegal drugs sa iya nasakupan.

Sabat ini ni Odicta sa pamangkot sang mga katapo sang media nga posible magbulos sa illegal drug trade ang bata ukon right hand ni Melvin.

Si Melvin nga gin-identify sang PDEA 6 nga drug group leader kag iya asawa nga si Meriam ang gintiro patay sa Caticlan Jetty Port sa Malay Aklan sang Agosto 29 sang kaagahon. (JoMaque)