Guimaras Police, Nanindugan nga Wala sang Shabu Laboratory sa Isla!

Guimaras–Ginpanindugan ni Guimaras Police Provincial Office Director Leo Erwin Agpangan nga wala sang shabu laboratory sa isla.

Base ini suno sa iya sa resulta sang una nga verification sang mga pulis sang nagligad nga administrasyon. Apang ginpahayag ni Agpangan nga nagahimo sila sang re-validation sa mga impormasyon nga nabaton ni Police Regional Office 6 Director PCSUPT Jose Gentiles angut sa ginreport nga shabu laboratory sa Guimaras.

Gin-athag ni Agpangan nga wala sila naga-untat sa pag-validate bangud prayoridad sang kapulisan nga mauntat ang illegal nga nga druga sa probinsya.

Wala naman ini sang ideya kon ano ang basehan ni Mayor Jed Patrick Mabilog sa pagpalabtik sang istorya nga posible may shabu laboratory sa Guimaras. Kon may naga-egsister gid man nga shabu laboratory sa Guimaras, dapat una sini nga makahibalo ang kapulisan suno kay Agpangan.

Una na ginpabutyag ni Mayor Mabilog nga posible nagalikaw ang mga Guimarasnon sa x-ray machine sa Guimaras-Iloilo Ferry Terminal bangud nahadlok sila nga may makita sa ila bagahe. (AGB)