Uncategorized

Zika Update: City Health Office, Mang-spray sang Insecticide sa Benedicto, Jaro!

Iloilo City–Maga-spray sang insecticide sa 530 ka mga balay sa Barangay Benedicto, Jaro ang taga-City Health Office sa Sabado agud mapatay ang mga lamok nga nagadala sang dengue, zika virus kag chikungunya.

Suno kay City Health Officer Dr. Bernard Caspe, nakapanghatag na sila sang sulat sa pamalay agud ipahibalo ang aktibidad. Ginpa-athagan nila ang mga pumuluyo nga bakantehon sa sulod sang tatlo ka oras ang ila mga balay kag tabunan ang mga kagamitan kag pagkaon agud indi ma-apektuhan sang insecticide.

Gin-athag ni Dr. Caspe nga mga adult mosquitoes ang target sang pagpang-spray ilabe na ang mga nagatapik sa dingding sang mga balay.

Suno pa kay Caspe, antes pa ginkumpirmar kahapon sang Department of Health ang dugang nga duha ka kaso sang zika virus sa Iloilo City, naplanuhan na sang city health officials ang pagpang-spray sang insecticide sa barangay. Sa Barangay Benedicto naga-istar ang una nakumpirma nga kaso sang zika virus kag kaupod man sini sa balay ang duha pa nga nag-positibo sa virus. (AGB)

Leave a Reply