Gov. Arthur Defensor, Nagsugid sang mga Gin-istoryahan sa Local Governance Dialogues sa Davao City

Iloilo City — Nakatutok sa peace and order, kampanya kontra illegal nga druga kag spcial development ang gin-istoryahan sa Local Governance Dialogues sa Davao City upod si Presidente Rodrigo Duterte.

Suno kay Governor Arthur Defensor, seryoso si Duterte nga malab-ot ang kalinong sa tunga sang gobierno kag mga rebelde nga New People’s Army kag muslim cessationist.

Naghingyo ang presidente sa mga alkalde kag gobernador nga buligan nga magmadinalag-on ang kampanya kontra illegal nga druga agud malab-ot ang ginahandum nga kalinungan kag pag-uswag sang pungsod.

Samtang gin-athag sang gobernador nga nag-upod sila nanday Duterte kag DILG Secretary Mike Sueno sa ibabaw sang stage bangud ang conference gin-sponsor sang DILG kag Union of Local Authorities of the Philippines sa diin isa sa mga miembro si Defensor.

Apang ginpahayag ni Defensor nga wala sila naka-istoryahanay ni Duterte bangud masako ini sa iya speaking engagement.

Yara man si Maasin Mayor Mariano Malones kag nabugno sini si Duterte. Nakatambong man si Mayor Jed Patrick Mabilog apang indi makasiguro si Defensor kun naistorya sini si Duterte.

Sanday Malones kag Mabilog sa nahibaluan ginhingadlan ni Duterte nga mga protector sang illegal drugs. (JoMaque)