Mga Drug Users sa San Felix, City Proper, Naka-avail sang Rehabilitasyon nga Gingastuhan ni Punong Barangay Diday Navarro

Iloilo City–Todo bantay si Punong Barangay Diday Navarro sang San Felix, City Proper sa rehabilitation sang mga nag-surrender nga drug users sa iya barangay.

Suno sa kapitan nga nagpanguna agud madayon ang rehabilitasyon, bastante sa vitamins kag bulong ang mga users nga gina-rehab. Magluwas sini, ginahatagan man sila sang iban nga kalingawan agud malikawan nga magbalik liwat sa bisyo. Iisa na ka bulan nga nagapa-idalum sa rehabilitation program ang 21 ka mga drug users sa Barangay San Felix kag nalipay ini sa positibo nga resulta.  Plano ni Kapitan Navarro nga ipa-drug test sa Nobyembre ang mga users agud masiguro nga wala na sila nagagamit sang illegal nga druga.

 ‘Salamat’

Nagapasalamat naman ang drug user nga si alyas Jeller nga ginhatagan sila ni Kapitan Navarro sang ikaduha nga tsansa nga magpangabuhi sang normal. Suno kay Jeller, nakulbaan sila tanan nga mapreso kag mapatay gani nagdesisyon sila nga mag-untat sa bisyo kag magbag-o sang pangabuhi.

Si Jeller ang madugay na nga nagamit sang illegal drugs antes nagdesisyon nga magsurrender kag magpa-rehab. 1995 ini nagsugod sa pagtilaw sang shabu sa pagpati nga maalam siya kun magka-roro apang labe lang siya nga nagamango. Gin-ako man ni Jeller nga may mga tion nga nagapangita gid sila sang illegal drugs apang ginabatuan nila paagi sa paglingaw sa ila mga kaugalingon pareho sang pagkaon, sports kag iban pa nga mapuslanon nga butang. (AGB)