Duha ka Punong Barangay, Nanginwala sa Report sang City DILG nga Wala Sila Nagapaninlo kon Sabado

Iloilo City–Ginpanginwala ni Punong Barangay Barbara Joy Aroza sang Nabitasan, Lapaz ang report sang City DILG nga wala sila nagpaninlo sa ila barangay.

Suno kay Aroza, posible nga sala ang report nga ginpasa sa City DILG bangud consistent ang ila pagpaninlo kada Sabado. Ang report pirmado ni city DILG Director Atty. Ferdinand Panes kag ginpasa sa opisina ni Councilor Candice Tupas, ang proponent sang resolution nga nagatalana sang kada Sabado nga cleanup day sang mga barangay officials sa syudad agud nga makalikaw sa dengue, chikungunya kag zika virus.

Suno naman kay Punong Barangay Lorence Lorenzo sang Sto. Domingo, Arevalo kag presidente sang liga sa nasambit nga distrito, dapat indi lang magsalig sa mga pictures ang naga-monitor kundi kinahanglan nga magkadto ang representante sang City DILG, Health Office kag Association of Barangay Captains sa kabarangayan agud magvalidate ang pagpaninlo. (AGB)