Uncategorized

PO1 nga Nagtiro-Patay sa Tag-iya sang Videokehan sa Concepcion, Posible Pasakaan sang Kaso sa Lunes–Concepcion COP

Concepcion, Iloilo–Posible mapasaka sa Lunes ang kaso nga murder kag frustrated murder batuk kay Police Officer (PO) 1 JV Longno, assigned sa Regional Public Safety Battalion (RPSB) sa Barangay Nipa, Concepcion.
Kasunod ini sang pagtiro patay ni Longno sa tag-iya sang videokehan nga si John ‘Junjun’ Namud sang Biernes sang gab-i. DOA sa Sara District Hospital si Namud bangud sang pilas sa ulo. Padayon naman nga ginabulong sa Western Visayas Medical Center ang kaupod ni Namud nga si Lindy ‘Kano’ Franco nga may pilas sa paa.
Nagaduda si PCI Jonathan Pinuela, hepe sang Concepcion Police Station, sa rason ni Longno nga nagahimo siya sang surveillance bangud may nabaton siya nga impormasyon nga may mga tawo nga nagabitbit sang pusil kag nagasulod sa videokehan.
Suno sa asawa ni Namud, naakig ang pulis matapos nga nagbalibad ang iya bana nga pasugtan ini nga mag-extend sa pagkanta bangud nga nagasunod sila sa curfew nga alas-10 sa gab-i.
Ginatipon na ni Pinuela ang affidavit sang asawa kag testigo agud nga mapasaka ang
kaso. (AGB)

Leave a Reply