4 Police Officials, 5 PNCOs sa Western Visayas Ginrelieve sang Camp Crame
Gin-relieve ang apat ka police officials kag lima ka police non-commissioned officers halin sa Western Visayas.
Naghalin ang mandu sa Camp Crame paagi sa duha ka special order nga ginpaguwa sang damlag lang. Ginmanduan ang siyam ka pulis nga magreport sa Personnel Holding and Accounting Unit (PHAU) sa PNP National Headquarters sa Camp Crame sa Quezon City.
Ginkumpirmar ni Police Regional Office (PRO) 6 Spokesman PSUPT Gilbert Gorero ang pag-relieve kanday PSUPT Richard Adonis Habawel, Company Commander sang Iloilo Police Provincial Office; PSI Ariel Corcino, hepe sang Pototan Police Station; PSI John Ryan Doceo, hepe sang Provincial Anti-Illegal Drug Special Operations Team kag PCI Lorenez Losaria nga assigned sa Regional Personnel Holding and Accounting Unit (RPHAU).
Gin-relieve man sanday SPO1 Danilo Bantillo; PO3 Miguel Blancia; PO1 Raymund Bolivar; PO1 Mark Felicio kag PO1 Oliver Train.
Ginpahayag ni PSUPT Gorero nga wala pa siya sang ideya kon nga-a ginrelieve ang apat ka opisyal. Pero sa kaso sang lima ka PNCOs, may nagpositibo sa mga ini sa drug test kag may pending nga kaso.
‘Kabahin sang Trabaho’
Ginakabig naman ni PSI Corcino nga kabahin sang trabaho ang pag-relieve sa iya. Pero indi siya magpati sa naguwa nga impormasyon nga rason sa pag-relieve ang pagduda sa iya nga kabahin sang ‘ninja cops’ ukon ang mga pulis nga may koneksyon sa illegal drugs.
Suno kay Corcino, makita man sa iya records nga aktibo siya sa kampanya kontra sa illegal nga druga sa Pototan. Handa naman si Corcino nga magpa-imbestigar agud nga matinluan ang iya pangalan. (AGB)