Skate Park sa Molo, Ginhabuyan sang Granada!

Iloilo City–Ginhabuyan sang granada ang ‘Skate Park’ sa East Baluarte, Molo kahapon sang kaagahon.

Suno kay alyas Rey, salaligan sang tag-iya nga si Stephen Guanco, ginpukaw siya sang iya asawa sang nabatian ang paglupok gani nagpahibalo ini sa mga pulis. Sang gin-review ang kuha sang CCTV camera, nakita ni Rey ang puti nga awto nga madasig nagpalagyo matapos ang paglupok. Indi naman ma-athag sa CCTV footage ang plate number sang salakyan.

Duha ka grupo ang ginasuspetsuhan may kahilabtanan sa insidente.

Una suno kay Guanco ang grupo sang kalalakihan nga una ginsaway sang iya tinawo bangud nga magahod ang isa nila ka kaupod samtang nagahampang sang billiard. Apang imposible suno kay Guanco nga manghaboy gid sang granada ang ginsaway nga lalaki bangud wala man ini ginsakit sang iya tinawo.

Ginadudahan man ni Guanco ang grupo nga ‘Rampage’ sa diin isa sa mga miembro nila ang skater sa park. Madumduman ang nasambit man nga grupo ang gintudlo nga nagpangkastigo sa apat ka customers sang Tata Linagaan sa Guzman-Jesena, Mandurriao sang Sabado sang kaagahon.

Suno kay PSI Mark Cordero, hepe sang Molo Police Station, ginapadalman nila ang imbestigasyon sa insidente. Wala pa gid suno sa iya sang nakuha nga identity sang mga suspetsado. (AGB)