Iloy sang Anay Miembro sang RUMPAGE Nanginwala nga may Kahilabtanan ang iya Bata sa mga Gamo nga Ginabasol sa Grupo

Iloilo–Nakulbaan ang iloy sang anay miembro sang RUMPAGE nga may malain nga matabo sa iya bata kasunod sang pagkadalahig sang grupo sa pagpangastigo sa mga customers sa Tata Linagaan sa Mandurriao sang nagligad nga semana.

Gin-athag ni Mrs. Mercy Alarde nga wala sang kahilabtanan ang iya bata bangud madugay na ini nga wala naga-upod sa RUMPAGE kag may kaugalingon na nga pamilya.  Gin-ako ni Mrs. Alarde nga notorious ang RUMPAGE duha ka tuig na ang nakaligad bangud ginpasibangdan sadtu ang iya bata sa pagpatay sa nurse sa Molo. Wala suno sa iya sang sala ang RUMPAGE sa krimen kag gindalahig lang sila sang kontra nila nga grupo.

Suno pa kay Mrs. Alarde, madugay na nga nagbulag sa RUMPAGE ang iya bata gani wala na ini nakahibalo kun sin-o ang mga bag-o nga miembro sang grupo.

Una na nga nagpaandam si ICPO Director PSSUPT Remus Zacharias Canieso sa RUMPAGE nga untatan ang pagpanggamo kun indi nila luyag maghinulsol sa ulihi. Ang nasambit man nga grupo ang ginadudahan nga naghaboy sang granada sa skate park sa East Baluarte, Molo sang nagligad nga semana. (AGB)