Suspek sa Pagtir-Patay sa Manugbaligya sang Isda sa Molo, Nanginwala nga Illegal Drugs ang Rason sang Krimen!

Iloilo City–Ginpanghiwala ni Renante Mendoza, 25-anyos sang Brgy. Pili, Ajuy nga illegal drugs ang rason sang pagtiro patay kay Leonel Capanang alyas Negro, 26-anyos sang Dulunan, Arevalo sa Molo kahapon.

Suno kay Mendoza, transaksyon lang sa inugbulang nga manok ang tuyo nila kay Capanang kag indi shabu. Gin-ako sini nga naakig siya bangud ginapabalik-balik sila sang biktima matapos nga nakabayad sang P1, 500 para sa manok.

Nagpasalig suno sa iya si Capanang nga ihatag ang manok apang wala nagtupa gani ila ginkadtuan kag ginbawi ang kuwarta. Gin-athag ni Mendoza nga wala sa ila plano nga patyon ang biktima.

Si Mendoza ang ginpahayag nga driver sang motorsiklo samtang angkas sini sanday Bernardo Espinosa alyas “Toto” sang Cagbang, Oton kag Christian Magda-el sang Calumpang, Molo. Si Espinosa ang gintudlo ni Mendoza nga nagtiro kay Capanang.

Una na ginsugid ni Magda-el nga illegal drugs ang ipabakal sang mga suspek kay Capanang apang wala sini ginsunod gani nga ginpatay. Nakahanda nga magtestigo si Magda-el agud matinluan suno sa iya ang iya pangalan. (AGB)