19 ka Banwa sa Probinsya sang Iloilo, Nahalitan sang Bagyo Marce

Iloilo–Naglab-ut sa 19 ka kabanwahanan sa probinsiya ang nagreport nga nahalitan sang Bagyo Marce tubtob las-8 kaina sang aga.

Sa record ni Provincial Disaster Risk Reduction and Management Council ukon PDRRMC Executive Director Jerry Bionat, nagalab-ut sa 127 ka mga barangay apektado. Narecord naman ang 724 ka pamilya ukon 3, 681 ka indibidwal ang naapektuhan, pinakadamo sa quarto distrito.

Una na nakalab-ut kay Bionat ang report nga isa ang napatay sa Barotac Viejo matapos nakuryente. Ginpahayag nga may naguba man nga mga sakayan pandagat sa Estancia kag Carles kag madamo nga talamnan ang nalapawan sang tubig.

Ginahulat pa sang PDRRMC ang report halin sa iban pa nga kabanwahanan. (AGB)