2017 executive budget sang syudad, gin-aprubahan sang City Council; proposed annual budget naman sa probinsya, talakayon sang Provincial Board sa masunod nga session

Iloilo–Aprubado na sang City Council ang P2.1 billion nga executive budget sang Iloilo City government sa masunod nga tuig.

Wala sang nag-angal nga miembro sang konseho sa gintawag ni Councilor Eduardo Peñaredondo, chairman sang Committee on Appropriations, nga conservative budget.

Magluwas sa sweldo sang mga casual employees, daku nga parte sang budget ang gin-alokar sa gindali-dali loan sang syudad nga P360 million sa Landbank of the Philippines nga gintalana para sa pagpatindog sang mga school buildings may kaangtanan sa K-12 program.

Provincial Budget

Talakayon naman sa masunod nga regular session sang Sangguniang Panlalawigan ang proposed 2017 annual budget.

Gin-aprubahan kahapon sang SP ang Committee Report sang Committee on Appropriations angut sa 2017 executive budget kag Local Economic Enterprise Office budget. Nagalab-ut sa P2.3 billion ang proposed executive budget sa masunod nga tuig kag P748.2 million sa LEEO. (AGB)