Mga barkers sa syudad, dapat magpa-rehistro–Mayor Mabilog

Iloilo City–Ginapa-rehistro ni Mayor Jed Patrick Mabilog ang mga barkers sa syudad agud nga ma-regulate.

Pahayag ini ni Mayor Mabilog sang nagkadto sa Aksyon Radyo Iloilo agud nga magsabat sa pila ka isyu. Suno sa alkalde, hatagan sang ID ang mga barkers kag ipa-miyembro sa asosasyon.

Aminado si Mabilog nga nakalab-ut sa iya ang impormasyon nga may mga barkers nga kakunsabo sang mga traffic aides kag ginapa-aksyonan niya na ang problema sa Transportation Management and Traffic Regulation Office (TMTRO).

Madumduman nga ginhatagan sang syudad sang P5k ang mga barkers bilang livelihood assistance agud mag-untat sila sa ila pagpanawag sang mga pasahero agud magsakay sa depasahero nga mga jeep pero nagapadayon tubtob subong ang problema. (AGB)